იურისტების და უფლებადამცველების ჯგუფი მედიაციის პროცესში მონაწილე ხელისუფლებას, ოპოზიციურ პარტიებს, ასევე საერთაშორისო ორგანიზაციებსა და პარტნიორი ქვეყნების ელჩებს მიმართავს.

მათი განცხადებით, ევროკავშირისა და პარტნიორი სახელმწიფოების ელჩების მედიაციით, სახელისუფლებო და ოპოზიციურ პარტიებს შორის წარმოებული მოლაპარაკების ფორმატი იძლევა უნიკალურ შესაძლებლობას – შედგეს შეთანხმება ქვეყნისთვის უმნიშვნელოვანეს საკითხებზე. 

“გამომდინარე იქედან, რომ სამართლიანი სასამართლო ქვეყნის დემოკრატიული განვითარების მთავარი ქვაკუთხედია, რომლის გარეშეც შეუძლებელია დავების მშვიდობიანი მოგვარება, ადამიანის უფლებების დაცვა და ქვეყნის ეკონომიკური განვითარებისთვის ხელსაყრელი პირობების შექმნა, მიგვაჩნია რა, რომ ევროკავშირისა და პარტნიორი სახელმწიფოების ელჩების მედიაციით, სახელისუფლებო და ოპოზიციურ პარტიებს შორის წარმოებული მოლაპარაკების ფორმატი იძლევა უნიკალურ შესაძლებლობას –  შედგეს შეთანხმება ქვეყნისთვის უმნიშვნელოვანეს საკითხებზე,” – ნათქვამია ერთობლივ განცხადებაში.

უფლებადამცველების განცხადებით, დამოუკიდებელი სასამართლოს არ არსებობა ქვეყანაში მიმდინარე სოციალური, პოლიტიკური და ეკონომიკური კრიზისის გამომწვევი ერთ ერთი მთავარი ფაქტორია. მათივე თქმით, დღემდე საქართველოში სასამართლო რეფორმა განხორციელდა ზედაპირულად, მართლმსაჯულების სისტემაში არსებული სიღრმისეული პრობლემების სათანადო შესწავლისა და გამომწვევი მიზეზების ანალიზის გარეშე;

ამასთან, ქვეყანაში დამკვიდრდა პოსტსაბჭოური და პოლიტიკურად მიკერძოებული სასამართლო სისტემა და მართლმსაჯულების მიმართ მოსახლეობის უნდობლობა;

“კანონმდებლობის გაუმჯობესების და გარკვეულწილად წინგადადგმული ნაბიჯების მიუხედავად, სასამართლო სისტემაში დამკვიდრდა კლანური მმართველობა, რაც იმას ნიშნავს რომ მოსამართლეთა ვიწრო, მონოლითური ჯგუფი ცენტრალიზებულად და არაფორმალურად აკონტროლებს მართლმსაჯულებას;

მივმართავთ, პოლიტიკურ აქტორებს და ვითხოვთ მედიატორი პირების და ორგანიზაციების დახმარებას რომ:

1. შედგეს შეთანხმება სასამართლოში არაჯანსაღი გავლენების სისტემური მიზეზების დადგენის, მათი აღმოფხვრის და სამომავლო პრევენციის მიზნით ეფექტიანი და არაფრაგმენტული სასამართლო რეფორმის გატარების შესახებ.

2. შეთანხმების რეალურად შესრულების და სასამართლო რეფორმის სანდო პროცესის უზრუნველსაყოფად, ხელისუფლების, ოპოზიციის, სამოქალაქო საზოგადოების და საერთაშორისო პარტნიორი ორგანიზაციების მონაწილეობით შეიქმნას სარეფორმო ჯგუფი რომელიც შეისწავლის მართლმსაჯულების სისტემაში არსებულ მდგომარეობას, წარმოადგენს არსებული ვითარების სიღრმისეულ ანალიზს, რომლის საფუძველზე მიღებული რეკომენდაციები ფართო პოლიტიკური კონსესუსით იქნება მიღებული და განხორციელებული,” – ვკითხულობთ გავრცელებულ განცხადებაში.

სალომე სარიშვილი
ავტორი

მსგავსი თემები