შს მინისტრის მოადგილის ალექსანდრე დარახველიძის განცხადებით, ანასტასია შატალოვას მკვლელობის საქმესთან დაკავშირებით ყველა საჭირო საპროცესო მოქმედება ხორციელდება, რათა დანაშაულის ჩამდენი პირები დროულად დადგინდნენ და პასუხისგებაში მიეცნენ.

მისივე თქმით, გამოძიება დაწყებულია განზრახ მკვლელობის მუხლით და პოლიცია ყველა ვერსიაზე, ყველა მიმართულებაზე, რაც შეიძლება ამ საზარელ ფაქტთან იყოს დაკავშირებული, აქტიურად მუშაობს.

„მიმდინარეობს შესაბამისი საგამოძიებო და საპროცესო მოქმედებები. წინასწარი ინფორმაციის გაჟღერებისგან თავს შევიკავებ. ყველაფერს ვაკეთებთ იმისთვის, რომ დანაშაულის ჩამდენი პირები სისხლის სამართლებრივ პასუხისგებაში დროულად მიეცნენ,“ – განუცხადა ჟურნალისტებს შს მინისტრის მოადგილემ.

შეგახსენებთ, რომ ანასტასია შატალოვა გუშინ, თბილისში გვიან ღამით მოკლეს.

მეზობლებმა რამდენიმე გასროლის ხმა გაიგეს და დაინახეს შემთხვევის ადგილიდან გაქცეული მამაკაცი.

არსებული ინფორმაციით, მას ბათუმის ყოფილ ვიცე-მერთან მცირეწლოვან შვილთან დაკავშირებით დავა ჰქონდა. რა გახდა მკვლელობის მოტივი, ამ დრომდე უცნობია.

ბათუმის ყოფილი ვიცე-მერი: მეც შეძრული ვარ ამ ტრაგედიით, ბოლო ექვსი თვის განმავლობაში საერთოდ არ მინახავს

გამოძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს.

სალომე სარიშვილი
ავტორი

მსგავსი თემები