პირველად  მოვისმინე ადეკვატური, სიტუაციასთან შესაბამისი, მეცნიერებაზე დაფუძნებული, ნაკლებად პოლიტიზირებული, ნაკლებად მხოლოდ ბიზნესზე ორიენტირებული და პრაგმატულად სწორი გადაწყვეტილება, – ასე აფასებს პროფესორი გიორგი ფხაკაძე ქვეყანაში დაწესებულ ახალ შეზღუდვებს “ფორტუნას” გადაცემაში “კვირის თემა” და აღნიშნავს, რომ საკოორდინაციო საბჭოსგან შემოთავაზებულ ყველა პუნქტს სრულად ეთანხხმება.

“ძალიან მძიმე მდგომარეობაა ქვეყანაში, ვეღარ ვაკონტროლებთ ვითარებას და როგორც ჩანს, პირველად, საღმა აზრმა გაიმარჯვა. ნამდვილად გამიკვირდა, პირველად ვნახე საქართველოში, გლობალურად ამდენი სწორი გადაწყვეტილების ერთდროულად მიღება და განხორციელება.”

ფხაკაძე მიიჩნევს, რომ ქვეყანაში შექმნილი მძიმე ეპიდსიტუაციის გათვალისწინებით, არავაქცინირებული პირების სხვადასხვა დაწესებულებაში ვიზიტი დროულად უნდა აიკრძალოს.

“ყველა იმ პუნქტს რომელიც საბჭოსგან იყო შემოთავაზებული თავიდან-ბოლომდე ვეთანხმები, თუმცა, მე, ალბათ უფრო მეტად რადიკალური ვიქნებოდი კოვიდპასპორთებთან, ე.წ მწვანე საშვებთან დაკავშირებით. საფრანგეთში, უკვე, ორშაბათიდან აღარ დაიშვებიან პირები საზოგადოებრივ ტრანსპორტსა თუ კაფეებში.  საქართველოშიც ამ კუთხით შეზღუდვის დაწესება არა სექტემბრიდან, არამედ სასწრაფოდ  უნდა დაწყოს.”

საზოგადოებრივო ჯანდაცვის ექსპერტი ამბობს, რომ ქვეყანაში შექმნილ ფონს კიდევ უფრო მეტად ართულებს დაგეგმილი არჩევნები, რომელიც მისი განცხადებით ვირუსის გავრცელების ერთ-ერთი მთავარი ხელშემწყობი ფაქტორია.

“აქ არის პოლიტიკური მომენტი, არჩევნებია და მე სულ ვამბობდი, რომ  ჩვენ ახლა შევდივართ არჩევნების ფაზაში. არჩევენები კი  არის ყველაზე დიდი ბუსტერი, მიზეზი, რატომაც ვრცელდება ვირუსი სწრაფად და დღეს ვხედავთ, რომ ყველა პოლიტიკური პარტიის მიერ მიღებული სხვადასხვა გადაწყვეტილება არის მხოლოდ არაპროფესიონალური და პოლიტანგაჟირებული.

გულწრფელად გამიკვირდა და გამიხარდა, რომ როგორც ჩანს შეძლო ჯანდაცვის მინისტრმა თავისი პოზიციის გატანა და ჩვენ ახლა გვაქვს ნაკლებად პოლიტიკური და უფრო მეტად  ჯანდაცვის სფეროსკენ მიმართული გადაწყვეტილებები. აღმოჩნდა, რომ არჩევნების პერიოდშიც ყოფილა მსგავსი შეზღუდვების დაწესება შესაძლებელი.” – განაცხადა გიორგი ფხაკაძემ ნინი ხუგაშვილის გადაცემაში “კვირის თემა”.

მისივე მოსაზრებით, შეზღუდვების დაწესების ფონზე, არსებული ეპიდვითარების გაუმჯობესებას 2 კვირის შემდეგ უნდა ველოდოთ.

 

მსგავსი თემები